Një incident i pazakontë ka vënë në lëvizje autoritetet në Guangdong, ku një grua u filmua duke hedhur nga apartamenti i saj një shumë të madhe parash, që sipas vlerësimeve arrin rreth 162 mijë dollarë.
Videoja, e cila u përhap me shpejtësi në rrjetet sociale, tregon kartëmonedha që bien nga një ndërtesë shumëkatëshe, duke shkaktuar kaos në zonë. Banorë dhe kalimtarë u panë teksa nxituan të mblidhnin paratë që shpërndaheshin në rrugë.
Sipas informacioneve, bëhej fjalë për kartëmonedha prej 1,000 dollarësh të Hong Kongut, ndërsa administrata e pallatit konfirmoi se ato ishin autentike. Rrethanat e ngjarjes mbeten ende të paqarta: disa raportime e lidhin veprimin me një konflikt personal mes gruas dhe bashkëshortit të saj, ndërsa burime të tjera sugjerojnë se ajo mund të ketë qenë nën presion psikologjik pas lajmeve për shëndetin e një të afërmi.
Ndërkohë, autoritetet lokale kanë nisur hetimet për të sqaruar plotësisht rastin dhe u kanë bërë thirrje qytetarëve që kanë marrë para t’i dorëzojnë ato, pasi konsiderohen pjesë e një ngjarjeje nën shqyrtim zyrtar.
