Familjarë, të afërm, miq dhe kolegë i kanë dhënë lamtumirën e fundit artistit pogradecar Ilir Shkurti i cili u nda nga jeta në moshën 68 vjeçare.
Mes dhimbjes dhe respektit për figurën e tij, të pranishmit e kujtuan si një njeri të përkushtuar ndaj artit dhe komunitetit.
Ilir Shkurti, një nga figurat më të dashura të skenës do të kujtohet për talentin e tij, humorin dhe energjinë që solli në teatër, në Estradën e Pogradecit dhe në kinemanë shqiptare.
Shkurti mori pjesë edhe në disa prodhime të kinematografisë shqiptare, mes tyre filmat “Rrethimi i vogël”, “Binarët”, “Ngjyrat e moshës”, “Shkëlqim i përkohshëm” apo dhe “Kush vdes në këmbë” duke u bërë pjesë e brezit të artistëve që kontribuan në filmat e periudhës së Kinostudios shqiptare.
Ndarja e tij është një humbje e madhe, por kujtimi i tij do të mbetet gjithmonë i gjallë në zemrat e të gjithëve që e njohën dhe e vlerësuan për atë çfarë i dha jetës artistike të Pogradecit dhe jo vetëm.
