Një ngjarje e rëndë është regjistruar në qarkun e Korçës, ku një i moshuar është gjetur pa shenja jete në banesën e tij. Sipas burimeve paraprake, ngjarja ka ndodhur në fshatin Bulgarec, ndërsa viktima është identifikuar si Gëzim Vija, 78 vjeç.
I moshuari është gjetur paraditen e kësaj të mërkure nga fqinjët, të cilët kanë ngritur alarmin pasi kanë vënë re se dritarja e banesës së tij ishte e thyer. Të shqetësuar nga kjo situatë, ata kanë hyrë në banesë, ku kanë konstatuar trupin e pajetë të 78-vjeçarit.
Menjëherë pas njoftimit, në vendngjarje kanë mbërritur shërbimet e Policisë së Korçës, të cilat kanë nisur këqyrjen e trupit dhe hetimet paraprake. Burime bëjnë me dije se në trupin e viktimës janë konstatuar shenja dhune, çka ngre dyshime se kemi të bëjmë me një vrasje.
Hetuesit po punojnë mbi pistën e një grabitjeje të mundshme, pasi përveç dëmtimit të dritares, dyshohet edhe për mungesë të një shume parash dhe disa orendive në banesë.
Ndërkohë, pritet që trupi i pajetë të transportohet drejt morgut për ekspertizë të plotë mjeko-ligjore, e cila do të hedhë më shumë dritë mbi shkaqet e vdekjes. Paralelisht, policia po verifikon kamerat e sigurisë në zonë, me qëllim identifikimin e autorëve dhe zbardhjen e plotë të kësaj ngjarjeje të rëndë.
