Ministrja e Ekonomisë dhe Inovacionit, Delina Ibrahimaj, në një deklaratë për mediat një ditë pas mbledhjes së Bordit të Transparencës për çmimin e karburanteve, u shpreh se qeveria po bën gati edhe një akt për të ndërhyrë në uljen e akcizës.
E pyetur nga gazetarja e Top Channel Rudina Muça, për paketa mbështetëse për qytetarët në këtë ‘valë’ luhatjesh dhe rritje çmimesh, ajo u shpreh se vendim do bëhet publik në momentin e duhur.
Sa i takon ndërhyrjeve të tjera, do të bëjmë një akt që do ndërhyjë në reduktimin e akcizës në nivel 20%, do të miratohet në këshillim e Ministrave dhe do behet publike në momentin e duhur. Kemi gjykuar që për pensionistët dhe shtresat në nevojë çmimi më i ndjeshëm është energjia elektrike dhe shporta bazë e ushqimeve. Nëse do të ketë nevojë për ndërhyrje, siç kemi bërë më parë, nuk ndryshuam çmimin e energjisë dhe ndërhymë në disa paketa mbështetëse për kategoritë në nevojë.
Arsyeja pse ne nuk e kemi ngritur më parë Bordin, është sepse kemi bërë monitorim ditor. Nuk ka pasur abuzim deri ditën e djeshme, që as ajo dje nuk mund të konsiderohet si abuzim. Në bazë ditore kemi kalkuluar sa janë çmimet dhe sa do ishin me Bord, dhe kanë qenë të balancuara deri ditën e djeshme. Bursa po luhatet me baza ditore, ne gjykuam ta fillojmë mekanizmin duke qenë se nuk pati reflektim brenda ditës.“- tha ajo.
Sa i përket luhatjes së çmimeve të shportës me produktet bazë, ministrja tha se po monitorohet çmimi i 80 produkteve ushqimore.
