Dy ditë pas akuzave të Partisë Demokratike, komisionerja evropiane Marta Kos është kundëpërgjigjur me një postim shpjegues, ku sqaron deklaratat e saj për korrupsionin dhe procesin e anëtarësimit në Bashkimin Evropian gjatë intervistës së saj për Politico e cila u prit me reagime të forta në Tiranë.
Në një postim në rrjetet sociale, ndonëse Kos nuk i përmend sulmet që i erdhën nga demokratët, e gjen të nevojshme ta bëjë të qartë se shoqëritë e vendeve që duan të futen në BEduhet ta heqin korrupsionin nga mendja. Në postimin e saj ajo insiston se anëtarësimi në BE kërkon jo vetëm ndërtimin e institucioneve të forta, por edhe ndryshim të mendësisë së shoqërive në të gjitha vendet kandidate, që edhe ato të luftojnë korrupsionit. Kos thotë se procesi i anëtarësimit mbetet i bazuar në meritë dhe se pavarësisht rrethanave, baza për anëtarësim mbetet e njëjtë për të gjithë.
Le të jemi shumë të qartë për atë që po ndodh. Këtë javë fola në Samitin ‘Competitive Europe’ të Politico. Shpjegova që ne kemi nevojë për debat të vazhdueshëm mbi procesin e anëtarësimit në Bashkimin Europian. Ndërkohë që kjo ndodh, ne duhet të jemi 100% të angazhuar ndaj mbështetjes së vendeve kandidate me reformat e nevojshme. Në të gjitha vendet kandidate, ndërtimi i institucioneve të forta demokratike është njëra anë dhe ana tjetër është ndryshimi i mentalitetit të shoqërive që edhe ato ta luftojnë korrupsionin. Procesi mbetet i bazuar në meritë. Ndërsa çdo kandidat ka rrethana specifike, baza për anëtarësimin në BE mbetet e njëjtë për të gjithë. Të hysh në BE nuk është thjesht për të markuar kutizat, por edhe për të bërë ndryshimin realitet” tha Kos.
Pak ditë më parë, në një intervistë për Politico, komisionerja lavdëroi punën e SPAK në luftën kundër korrupsionit dhe tha se rasti i Belinda Ballukut po monitorohet me shumë kujdes.
Por ajo që preku nervin e Partisë Demokratike në Shqipëri ishte pikërisht deklarata se eliminimi i korrupsionit në një vend, nuk varet vetëm nga ligjet anti-korrupsion që miratohen, por edhe nga mendësia e popullit në raport me fenomenin.
“Mund të kesh legjislacionin më të mirë për të luftuar korrupsionin, por nëse korrupsioni pranohet në atë vend, atëherë juve keni një problem tjetër. Kështu që të gjitha këto vende po kalojnë nëpër procesin e ndryshimit të mendësisë në raport me korrupsionin dhe kjo kërkon kohë”,- tha Kos për Politico .
I irrituar nga kjo deklaratë të cilin e quajti ‘të pabesueshme’ kreu i Grupit Parlamentar të Partisë Demokratike, Gazment Bardhi, kërkoi distancimin e institucioneve europiane nga “përgjithësime të papërshtatshme për shqiptarët”. “Ju nuk keni asnjë të drejtë të fyeni shoqërinë shqiptare, që është populli më proeuropian në botë” tha ai.
I menjëhershëm ishte edhe shpërthimi i Sali Berishës, i cili e akuzoi Kos-in se po sillet si ortake e një të korruptuari si kryeministri Edi Rama.
