Në kuadër të Ministerialit për Korridorin VIII që po mbahet sot në Tiranë, Zv/Kryeministër dhe Ministër për Punët e Jashtme dhe Bashkëpunim Ndërkombëtar i Italisë, Antonio Tajani theksoi rëndësinë strategjike dhe politike të këtij projekti për rajonin dhe për Bashkimin Evropian.
Në fjalën e tij, Tajani duke vlerësuar simbolikën e bashkëpunimit mes vendeve nënvizoi se Korridori VIII është sipas tij një zgjedhje e qartë politike dhe pjesë e strategjisë së përbashkët për forcimin e integrimit evropian të rajonit.
Tajani bëri të ditur se më 30 mars do të zhvillohet një takim i grupit të miqve të Ballkanit, me synim konfirmimin e mbështetjes për ribashkimin dhe bashkëpunimin rajonal.
“Më 30 mars do të kemi një takim të grupit të miqve të Ballkanit për të konfirmuar mbështetjen për ribashkimin e rajonit”, tha ai.
Sipas tij, Korridori 8 përfaqëson një nismë politike për të forcuar bashkëpunimin mes vendeve të rajonit dhe për të mbështetur integrimin e tyre në Bashkimin Evropian. Ai theksoi se prania e palëve në këtë ministerial konfirmon angazhimin për thellimin e marrëdhënieve dhe për çuarjen përpara të punës së nisur më 23 në Brindizi.
“Korridori 8 është një nismë politike për të forcuar bashkëpunimin tonë dhe për të mbështetur integrimin e rajonit në BE. Prania jonë konfirmon angazhimin dhe bashkëpunimin për të forcuar marrëdhëniet në rajon. Presim me padurim për të çuar përpara punën që kemi nisur në Brindizi më 23″, theksoi ai.
Tajani theksoi gjithashtu se përfundimi i Korridorit VIII përbën një objektiv sigurie dhe një prioritet të përbashkët strategjik, duke shtuar se palët janë plotësisht të angazhuara për të hedhur hapa konkretë dhe të sigurt drejt realizimit të tij.
“Korridori 8 është një përparësi e përbashkët strategjike për ekonominë tonë dhe për sigurinë tonë. Jemi plotësisht të angazhuar për të hedhur hapa të sigurt për realizimin e tij”, tha ai.
