Deputeti i partisë Mundësia, Erald Kapri ka denoncuar nga foltorja e Kuvendit dy raste flagrante dhe shqetësime që vijnë nga qytetarët në terren. Rasti i parë sipas Kaprit, lidhet me shqetësimin e disa banorëve të fshatit Rrjell të Velipojës, ku thuhet se po u merren padrejtësisht tokat për të ndërtuar një resort.
Sipas Kaprit, resorti në fjalë mban firmën e Ballukut. Po ashtu ai solli dhe një problematikë nga Gurrasi i Pogradecit, ku thuhet se një biznes ka ‘zaptuar’ 10 ha tokë, që u përkasin banorëve të zonës, që thuhet se i kanë përfituar nga ligji 7501.
“Dua të ngre dhe dy çështje, për të cilat jam kontaktuar nga qytetarë për dy ngjarje që po ndodhin janë me dhjetëra banorë të Rrjollit në Shkodër, që po përballen me policët? Aty thuhet se po ndërtohet një resort, dhe ata thonë se po u merren me toka. Thuhet se ka firmosur Balluku. Ajo edhe pse në hetim nga SPAK, ka guxim që të firmosë ende. Ndodh si në jug, banorëve po u merren provat. Ju çohet policia atje dhe trajtohen si kriminelë. Fshati Gurras, buzë liqenit të Pogradecit, më thonë; Erald na ka ardhur një biznes, ka rrethuar 10 ha tokë, i ka marrë nga bashkia dhe ne e dinim se ishin tokat tona me 7501. Shkuam në Hipotekë dhe na thonë që; nuk jeni ju pronarët. Po flasim për mijëra banorë, pasi ky fshat ka vuajtur nga disa probleme, ku dhjetëra të rinj iknin të luftonin në Siri. Në vend që t’ju jepej prona, shkojnë dhe ia rrethojnë dhe ia marrin. Nuk ka garanci për pronën në Shqipëri, por e vendos kjo qeveri se kush e merr pronën dhe kush përfiton! Kjo nuk shkon!”, tha ai.
