Kur kanë kaluar gati dy muaj nga ngjarja e ndodhur para fillimit të ndeshjes së basketbollit Tirana-Partizani, policia ka arrestuar tre persona. Shtetasit B.B, 33 vjeç; A.M, 38 vjeç; dhe A.Xh, 18 vjeç, të tre banues në Tiranë, akuzohen për prishje të rendit dhe qetësisë publike gjatë ndeshjes së basketbollit midis ekipeve Tirana–Partizani.
“Më datë 09.12.2017, rreth orës 17.30, në rruga “Dritan Hoxha”, para fillimit të ndeshjes së basketbollit e cila do zhvillohej në pallatin e sportit “Asllan Rusi” ndërmjet ekipeve Tirana–Partizani, këta shtetas me disa persona të tjerë ende të pa identifikuar, jashtë ambienteve të Pallatit të Sportit, kanë kundërshtuar me dhunë punonjësit e policisë së forcës së Posaçme “Shqiponjat” dhe shërbimet e tjera të Komisariateve të Policisë Nr 2 dhe 3 duke i goditur me sende të forta, gurë, drunj e shkopinj bejsbolli.
Ndërhyrja e menjëhershme e forcave të tjera të Policisë, bëri të mundur neutralizimin e veprimeve të mëtejshme nga ana e tifozëve kundrejt policisë si dhe më pas arrestimin e tre prej tyre të cilët qëlluan punonjësit e policisë me sende të forta”, thuhet në njoftimin e policisë.
Motivi i kësaj situate ka qenë se punonjësit e policisë kishin marrë detyrë që atë grup tifozësh prej afro 130 personash ta zhvendosnin nga aty ku ishin pozicionuar pasi ishin burim konflikti dhe ishin përgatitur të prodhonin konflikt me ekipin kundërshtar, atë të Tiranës.
Ndalimi i këtyre tre shtetasve është bërë nga Specialistët për Hetimin e Krimit në Komisariatin e Policisë Nr.3, ndërkohë që vijon puna për identifikimin, kapjen dhe arrestimin edhe të personave të tjetër që kundërshtuan me dhunë punonjësit e policisë.
Gjithashtu u referuan materialet në Prokurorinë e Rrethit Gjyqësor Tiranë, për shtetasin H.K, 29 vjeç, I.S, 23 vjeç, dhe TH.N, 20 vjeç, të tre banues në Tiranë, pasi në pallatin e sportit “Asllan Rusi”, gjatë zhvillimit të ndeshjes së basketbollit Tirana-Partizani, kanë prishur rendin dhe qetësinë publike.
Materialet procedurale në ngarkim të tyre i kaluan për veprime të mëtejshme Prokurorisë Pranë Gjykatës së Shkallës së Parë Tiranë për veprat penale “Kundërshtimi i punonjësit të policisë së rendit publik”, Prishja e qetësisë publike”, “Prodhimi, mbajtja, blerja apo shitja pa leje e armëve të ftohta, të kryera në bashkëpunim”.
