Një tragjedi ndodhi mbrëmjen e së mërkurës (26/11) në Burton Joyce, Nottinghamshire, Angli, kur një 14-vjeçar u godit nga një tren ndërsa po kalonte një kalim hekurudhor, duke mbetur i vdekur.
Sipas mediave, në vendngjarje nuk kishte drita paralajmëruese apo alarme, dhe këmbësorët duhet të vendosin vetë nëse është e sigurt të kalojnë kalimin.
Deri tani nuk ka tregues se 14-vjeçari Joshua Travis, ish-portier në akademinë e Nottingham Forest dhe në Aspire Football Coaching, ka kryer ndonjë gabim gjatë kalimit të hekurudhës.
Sipas British Transport Police (BTP), vdekja e tij nuk trajtohet si e dyshimtë, ndërsa hetimet nga Departamenti i Hetimit të Aksidenteve Hekurudhore (RAIB) janë në vazhdim.
Vetëm 24 orë para se Joshua të humbiste jetën, përgjegjësit e hekurudhave kishin bërë kërkesë për mbylljen e kalimit për arsye sigurie publike, për shkak të përdorimit të gabuar të tij dhe disa aksidenteve të shmangura me tren, njoftoi kompania Network Rail.
Të premten (27/11), Network Rail konfirmoi se u miratua mbyllja e përkohshme e kalimit në linjën Nottingham-Lincoln, e cila do të qëndrojë e mbyllur për 21 ditë, ndërsa vazhdojnë hetimet për vdekjen e të riut.
Banorët e zonës kishin shprehur herë pas here shqetësimet e tyre për këtë kalim hekurudhor, duke kërkuar që të mbyllej përgjithmonë ose të zëvendësohej me një urë për sigurinë e këmbësorëve.
