15 muaj pas vrasjes brutale të Egli Progës në Pogradec, sot asnjë prej 5 të akuzuarve nuk është në qeli. Me vendim të Gjykatës së Korçës, 3 ditë më parë, kanë lënë qelinë edhe dy vrasësit e dyshuar. Leonidha Guçe dhe Denis Meçe dolën nga paraburgimi, pasi prokuroria shkeli afatet, dhe Gjykata e Korçës caktoi ndaj tyre masën arrest shtëpie, deri në përfundimin e hetimeve. Ndërkohë, Arjan Manellari, Voltan dhe Andi Shkulaku, të akuzuar për moskallëzim krimi, po hetohen prej kohësh në masën detyrim paraqitjeje.
Vrasja e Progës ndodhi më datë 10 gusht 2024, por Prokuroria e Korçës ende po vijon me hetimet. Kamerat e lokalit ku ka ndodhur ngjarja janë çuar jashtë Shqipërisë për ekspertim.
Leonidha Guçe fillimisht ishte hetuar vetëm për moskallëzim krimi, por 9 muaj pas vrasjes Prokuroria zbuloi se edhe ai kishte marrë pjesë në rrajën brutale të Progës, bashkë me Denis Meçe.
