Një ngjarje e pazakontë ka tronditur opinionin publik në SHBA. Kryetari i bashkisë së Fort Lauderdale, Dean Trantalis, 72 vjeç, është bërë viktimë e një sulmi të dhunshëm nga ish-i dashuri i tij, 34-vjeçari Daniel Curran.
Sipas New York Post, incidenti ndodhi të shtunën në rezidencën luksoze të Trantalis, me vlerë rreth 1 milion dollarë. Mediat raportojnë se Curran e ka shtyrë me forcë kryebashkiakun dhe më pas e ka tërhequr përtokë për disa metra, duke i shkaktuar lëndime në kyçin e dorës, këmbë dhe gju.
Pas ngjarjes, Curran u arrestua dhe u akuzua për dhunë ndaj një personi mbi 65 vjeç dhe për shkelje të një urdhri gjyqësor për dhunë në familje. Gjykata caktoi një garanci prej 6,000 dollarësh dhe ndaloi çdo kontakt mes tij dhe kryebashkiakut.
Në deklaratën e tij, Trantalis tha se marrëdhënia e tyre kishte qenë “shumë e komplikuar” dhe se kishte tentuar ta ndihmonte ish-partnerin në përmirësimin e gjendjes së tij mendore. “Dështova në këtë përpjekje,” tha ai, duke shtuar se incidenti e bëri të kuptonte se nuk kishte më shpresë për pajtim.
Curran ishte aktiv në rrjetet sociale, ku përdorte emrin DannyTrantalis dhe shpesh prezantohej si “zotëria i parë i Fort Lauderdale”. Vetëm tre ditë para sulmit, ai kishte postuar një foto nga një darkë e përbashkët me Trantalisin.
Sipas CBS News, Prokuroria e Qarkut Broward po kërkon që çështja të transferohet në një juridiksion tjetër, për të shmangur konfliktet e interesit brenda të njëjtit qark.
Trantalis, i cili është kryebashkiaku i parë hapur homoseksual i Fort Lauderdale, nuk ka komentuar më tej për incidentin.
Burimi: New York Post
