Pasditen e sotme, 22 tetor, në Manëz të Durrësit është gjetur automjeti i 21 vjeçarit të shpallur në kërkim pas ngjarjes së rëndë, ku mbetën të vrarë dy djem të rinj, Flori Paluçi dhe Aranit Kurti.
Automjeti u gjet i fshehur pranë banesës së tij.
Pas kontrollit, në makinë është konstatuar një gjurmë plumbi.
Dinamika e ngjarjes tragjike
Ngjarja ka ndodhur rreth orës 01:45 të 22 tetorit 2025, pranë një karburanti në Manëz pas një konflikti mes disa të rinjve që ka agravuar në përdorimin e armëve. Viktimat u identifikuan si, Aranit Kurti, 23-vjeç dhe Flori Paluçi, 33 vjeç.
“Rreth orës 01:45 të datës 22.10.2025, në Manëz, pranë një karburanti, pas një konflikti dyshohet për motive të dobëta, kanë mbetur të vrarë me armë zjarri shtetasit A. K., 23 vjeç, dhe F. P., 33 vjeç, të dy banues në Manëz.”, thuhej në njoftimin e uniformave blu.
Kamerat e sigurisë zbuluan se Paluçi i cili ishte plagosur me armë zjarri kishte qëlluar dy herë në drejtim të 21-vjeçarit D.P, por plumbat nuk e kapën këtë të fundit dhe ai arriti të largohej me shpejtësi nga vendi i ngjarjes, i ndihmuar nga persona të tjerë.
Nga sherri verbal për kafen te përplasja fizike jashtë lokalit
Fillimisht njëri nga personat e përfshirë, 21-vjeçari me inicialet D.P, i shoqëruar nga miku i tij 23-vjeçari Aranit Kurti, i ka kërkuar një kafe kamarierit 17-vjeçar. Ky i fundit i është përgjigjur duke i thënë atij që ekspresi është fikur dhe se nuk mundet t’i shërbejë më. (Lokali zakonisht mbyllej në orën 00:00, por i mituri e kishte mbajtur hapur për shkak se kishte disa klientë ende brenda).
Mes tyre ka ndodhur një përplasje verbale ku ndaj të miturit janë përdorur edhe fjalë fyese, ku më pas është përfshirë edhe Flori Paluçi, i cili i ka dalë në krah kamarierit. Të rinjtë më pas kanë dalë për t’u sqaruar jashtë ambienteve të lokalit, ku fillimisht ka ndodhur një përplasje fizike, që ka degraduar më tej edhe në përdorimin e armëve.
“Ka qenë pikërisht Aranit Kurti ka qëlluar i pari me grusht ndaj Flori Paluçit, i cili më pas ka nxjerrë armën që (dyshohet ka qenë e pa vullnetshme) ka prekur Aranit Kurtin, duke e lënë të vrarë. Më pas ka ndërhyrë D.P., i cili ka qëlluar në drejtim të Flori Paluçit, i cili ka mbetur i vdekur pas shkëmbimit të zjarrit.”, raporton Daci.
Gazetarja raporton se në kamerat e sigurisë janë parë edhe dy gjuajtje të tjera të Flori Paluçit, në drejtim të 21-vjeçarit D.P, të cilat nuk e kanë prekur atë.
Policia po ashtu ka ngritur dyshime edhe për persona të tjerë të përfshirë që kanë kryer veprën penale për “moskallëzim krimi”, pasi autoritetet nuk janë njoftuar që në momentet e para në lidhje me konfliktin. Po ashtu ka dyshime se ka persona që e kanë ndihmuar 21-vjeçarin D.P të largohet nga vendi i ngjarjes dhe po e mbajnë të fshehur atë.
Kamarieri i përfshirë në konfliktin mes dy viktimave dhe autorit të shpallur në kërkim ka dhënë dëshminë e tij të parë për policinë, ku është shprehur se e gjitha nisi pas kërkesës për kafe, nga personi që tashmë është në kërkim, D.P.
“Ishte ora rreth 1:45, në momentin e ngjarjes ishin 5 persona. D.P hyri i pari në lokal me shokun e tij dhe më kërkoi kafe, ekspresi ishte i fikur dhe u thashë që nuk shërbejmë kafe në këtë orë. Ai ma ktheu se ‘dua kafe patjetër’ dhe filloi të më fyente me fjalë të rënda. Nuk e vazhdova më bisedën por ndërhyri Flori Paluçi për të më mbrojtur mua, Flori është banor i zonës dhe klient i lokalit, pra e njoh. Aty filloi konflikti fizik mes tyre, dhe dolën përjashta lokalit për ta vazhduar konfliktin.”, ka deklaruar kamarieri.
