Ndërsa presidenti i SHBA-së, Donald Trump, po shqyrton mundësinë e një veprimi ushtarak brenda Venezuelës, duke vendosur forca në Karaibe dhe duke dërguar bombardues B-52 në brigjet e vendit këtë javë, Nicolas Maduro po përgjigjet në të njëjtën mënyrë.
Ai zhvendos trupa, mobilizon “miliona” milicë dhe denoncon aktivitetin amerikan në rajon – një shenjë sfide nga ana e Maduros, ndërsa bëhet gjithnjë e më e qartë se të dy udhëheqësit ndodhen në përplasje të drejtpërdrejtë.Sipas CNN-it, zyrtarë të administratës Trump kanë pranuar privatisht se fushata gjithnjë e më intensive e presionit nga SHBA ka për qëllim rrëzimin e Maduros, një objektiv që ishte gjithashtu prioritet gjatë mandatit të parë të Trump, kur Shtëpia e Bardhë njohu udhëheqësin e opozitës së Venezuelës, Juan Guaidó, si presidentin legjitim të vendit në vitin 2019.
Por, ndërsa ekipi i Trump rrit presionin këtë vjeshtë, Maduro nga ana e tij ka forcuar retorikën dhe propagandën ndaj popullit venezuelian, duke kërkuar njëkohësisht ushtrime të reja ushtarake nga Forcat e Armatosura Kombëtare Bolivariane, të cilat përbëhen nga rreth 123.000 anëtarë.
Gjatë javëve të fundit, ushtria amerikane ka zhvendosur anije luftarake dhe armë të tjera në rajon, dhe ka shënjestruar anije në ujërat përreth Venezuelës, të cilat, sipas pretendimeve të saj, transportojnë drogë.
Më pas, të mërkurën, Trump pranoi se kishte autorizuar CIA-n të kryente një operacion të fshehtë në Venezuelë dhe deklaroi se Shtetet e Bashkuara po shqyrtojnë mundësinë e sulmeve në territorin e Venezuelës.
“Sigurisht që tani po shqyrtojmë edhe ndërhyrjen tokësore, sepse detin e kemi nën kontroll shumë të mirë,” deklaroi presidenti Trump për gazetarët të mërkurën.
Maduro pretendoi se milicitë vullnetare që ka mobilizuar numërojnë tani më shumë se 8 milionë rezervistë, megjithëse ekspertët kanë vënë në dyshim si këtë shifër, ashtu edhe cilësinë e trajnimit të këtyre forcave.
Që nga data 17 tetor, 20 nga 23 shtetet e Venezuelës janë militarizuar në kuadër të mobilizimeve ushtarake të Maduros, të cilat mbajnë emrin “Independence 200”.
