Është ndarë nga jeta në moshën 89-vjeçare Pippo Baudo, një nga figurat më të dashura dhe më të rëndësishme të televizionit italian.
Lajmi është konfirmuar nga burime pranë familjes dhe nga avokati i tij historik dhe mik i ngushtë, Giorgio Assumma.
Baudo ka qenë mjaft i njohur dhe i ndjekur edhe në Shqipëri, ku emisionet e tij kanë frymëzuar mijëra e mijëra njerëz për të bërë një jetë më të mirë.
I lindur më 7 qershor 1936 në Militello in Val di Catania, Baudo ka qenë për dekada një ikonë e padiskutueshme e ekranit, duke fituar zemrat e publikut me emisione që kanë bërë histori.
Ai u bë i njohur fillimisht me ‘Settevoci’ (1966–70) dhe ‘Canzonissima’ (1972–73), por suksesin më të madh e arriti në vitet ’80 me programe si ‘Domenica In’ (1979–85, 1991–92), ‘Fantastico’ (1984–86 dhe 1990), dhe ‘Serata d’onore’ (1983, 1986).
Pippo Baudo ka drejtuar plot trembëdhjetë edicione të Festivalit të Sanremos (1968, 1984–85, 1987, 1992–96, 2002–03, 2007–08), duke vendosur një rekord absolut dhe duke shënuar epoka të ndryshme në historinë e muzikës dhe televizionit italian.
Nga viti 1987 deri më 1988, ai ishte drejtor artistik i Canale 5, për t’u rikthyer më pas në RAI, ku vazhdoi të prezantonte programe të suksesshme si ‘Gran Premio’ (1990), ‘Varietà’ (1991), ‘Luna Park’ (1994–96), ‘Papaveri e papere’ (1995), ‘Mille lire al mese’ (1996).
Ndërkohë, nga viti 1989 deri më 1997, ai ka mbajtur edhe postin e drejtorit artistik – dhe më pas president – i Teatrit të Qëndrueshëm të Catanias.
Në vitin 1994 mori drejtimin artistik të RAI-së, post nga i cili dha dorëheqjen në maj të vitit 1996.
Gjatë kësaj periudhe ai debutoi në teatër me muzikalin ‘L’uomo che inventò la televisione’ nga Garinei dhe Giovannini, një vepër që luante me figurën e tij ikonike dhe frazën e njohur ‘E kam shpikur unë’, që iu ngjit për shkak të numrit të madh të talenteve që zbuloi dhe promovoi gjatë karrierës së tij.
Pas kthimit në RAI, ai prezantoi sërish ‘Domenica In’ (2005–10), ‘Giorno dopo giorno’ (1999), i cili më pas u bë ‘Novecento. Giorno dopo giorno’ në vitin 2000, ‘Passo doppio’ (2001), ‘Il Castello’ (2002–03), dhe emisione të tjerë kulturorë si ‘Novecento’ në vitin 2010 dhe ‘Il viaggio’ në 2012, që u rikthye me një edicion të dytë vitin pasues.
Në vitin 2018 ai publikoi autobiografinë ‘Ecco a voi. Una storia italiana’, e shkruar në bashkëpunim me Paolo Conti, ku rrëfen karrierën dhe jetën e tij.
Në vitin 2021, Presidenti i Republikës Italiane e nderoi me titullin Kalorës i Kryqit të Madh të Urdhrit të Meritës së Republikës Italiane, një nga nderimet më të larta shtetërore.
Pippo Baudo largohet duke lënë pas një trashëgimi të jashtëzakonshme televizive, artistike dhe kulturore që do të mbetet përherë në historinë e Italisë.
