Drejtori i Përgjithshëm i Policisë së Shtetit, Ilir Proda, i ka akorduar punonjësit të Policisë Rrugore, Klajdi Mustaj, Certifikatën për Shërbime të Dalluara. Kjo për shkak se ai ndërhyri pas një aksidenti në rrugën Levan-Fier duke shpëtuar tre qytetarë të dëmtuar.
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë në shpëtimin e tre bashkëqytetarëve është shembull frymëzues për të gjithë trupën policore. I shpreh mirënjohjen time dhe të gjithë Policisë së Shtetit për këtë akt human e profesional. Faleminderit për guximin dhe zemrën e madhe që tregove në shërbim të qytetarëve”, tha Proda.
Me veprimet e tij, Mustaj shmangu një tragjedi në Fier. Ai ndërhri menjëherë pasi një makinë u përplas me një pishë anës rrugës duke përfunduar i përmbysur dhe duke shpërthyer në flakë.
Mustaj, nuk priti shërbimet zjarrfikëse por i nxorri të gjallë të plagosurit nga makina që po digjej.
Inspektor Klajdi Mustaj është pjesë e Policisë së Shtetit prej shkurtit 2024, kur përfundoi Kolegjin Profesional për Patrullë të Përgjithshme.
