Një aksident rrugor është shënuar pasditen e sotme në aksin që të çon drejt fshatit turistik të Zvernecit, ku janë përfshirë tre automjete. Ngjarja ka shkaktuar panik mes banorëve dhe pushuesve që frekuentojnë zonën gjatë sezonit veror.
Sipas të dhënave paraprake, dy persona kanë mbetur të plagosur, mes tyre edhe një fëmijë. Të dy ndodheshin në një automjet me targa italiane dhe janë transportuar me urgjencë në Spitalin Rajonal të Vlorës, ku po marrin ndihmën e nevojshme mjekësore.
Policia ka mbërritur menjëherë në vendin e ngjarjes dhe ka nisur hetimet për të zbardhur rrethanat e aksidentit. Deri më tani, nuk dihen shkaqet e sakta të përplasjes, ndërsa të tre automjetet kanë pësuar dëme të konsiderueshme materiale.
