Kremlini ka reaguar pas takimit të Vladimir Putin dhe të dërguarit të Trump, Steve Witkoff.
Në një reagim për mediat, këshilltari i Vladimir Putin tha se kanë zhvilluar bisedime “konstruktive”, ndërsa afati i fundit i Donald Trump për Moskën për të rënë dakord për një armëpushim në Ukrainë po afron.
“Ishte një diskutim mjaft i dobishëm dhe konstruktiv. Kur bëhet fjalë për temat e tij, para së gjithash, ishte kriza e Ukrainës.
Dhe tema e dytë ishin perspektivat e zhvillimit të mundshëm të bashkëpunimit strategjik midis SHBA-së dhe Rusisë. Nga ana jonë, veçanërisht për çështjen ukrainase, u transmetuan disa sinjale. Sinjale përkatëse u morën edhe nga presidenti Trump.
Çështja tani është se presidenti ynë Putin zotëron informacion të plotë, duke përfshirë sinjalet tona dhe sinjalet nga Trump, ndërsa Trump nuk është njoftuar ende për rezultatet e këtij takimi.
Kështu që, do të përmbahesha nga komentet më të hollësishme. Le të shohim kur i dërguari special i SHBA-së, do të jetë në gjendje t’i raportojë Trumpit mbi bisedën e sotme.
Pas kësaj, ne do të jemi në gjendje t’i plotësojmë këto komente të mia me diçka më thelbësore”, tha këshilltari i Kremlinit.
