Revista prestigjioze “Forbes” e ka renditur Shqipërinë në listën e destinacioneve më tërheqëse, për amerikanët që duan të largohen nga Shtetet e Bashkuara për një jetë më të lirë dhe më të qetë.
“Forbes” e përfshinë Shqipërinë në listën e 24 vendeve më të mira për të jetuar jashtë vendit, ku janë analizuar mbi 96 destinacione në mbarë globin.
Sipas revistës amerikane vendi ynë ofron një klimë mesdhetare, plazhe mbresëlënëse, peizazhe të mrekullueshme, kosto të përballueshme jetese dhe një mënyrë jetese më të qetë dhe të relaksuar. Këto janë elementët që po tërheqin gjithnjë e më shumë amerikanë, veçanërisht pensionistë, që duan të fillojnë një jetë të re jashtë vendit.
Forbes nxjerr në pah natyrën e paprekur dhe mikëpritjen tradicionale shqiptare, një element që është kthyer në avantazh përballë vendeve të tjera më të industrializuara dhe më të kushtueshme në rajonin e Mesdheut.
Përzgjedhja është bërë mbi bazën e disa faktorëve kryesorë: kostoja e jetesës, siguria, kujdesi shëndetësor, ambienti gjuhësor, rreziku klimatik dhe, më e rëndësishmja, hapja e vendit ndaj pensionistëve amerikanë.
Përfshirja në listën e “Forbes” ngre edhe më shumë imazhin e Shqipërisë, jo vetëm për turizëm, por edhe si një vend ku shumëkush mund të ndërtojë një jetë të re.
