Një konflikt për motive pronësie ka degjeneruar në dhunë fizike në fshatin turistik Tushemisht, në afërsi të Pogradecit. Në përplasjen që ndodhi mesditën e sotme janë përfshirë kryeplaku i fshatit, Ilirjan Tasellari, pronari i “Hotel Voloreka”, Jetmir Muçllari, i afërmi i tij Johan Muçllari, si dhe shtetasi Prokop Pilinçi.
Sipas informacioneve paraprake, konflikti ka nisur pas një kërkese për lirimin e hapësirave publike që dyshohet të jenë zënë në mënyrë të paligjshme. Kërkesa vjen në kuadër të aksionit kombëtar për prishjen e ndërtimeve pa leje, i cili po zbatohet në të gjithë vendin.
Policia ka shkuar menjëherë në vendngjarje dhe po punon për sqarimin e rrethanave dhe zbardhjen e plotë të konfliktit. Ende nuk ka informacion nëse janë marrë masa ndëshkuese ndaj personave të përfshirë.
