PUBLIKOI VIDEON E ATENTATIT NDAJ ISH-PROKURORIT NDOJA/ Halit Valteri në GJKKO, i thirrur si dëshmitar në gjyqin e Plarent Dervishit dhe Julian Meçes

13 June, 2025 s.autor Aktualitet, Kronikë

Ish-deputeti Halit Valteri është thirrur këtë të premte në Gjykatën e Posaçme si dëshmitar në procesin ndaj Plarent Dervishit dhe Julian Meçes për atentatin ndaj ish-prokurorit Arjan Ndoja më 1 nëntor 2019. Në atë kohë, Valteri bëri disa deklarata dhe publikoi pamjet në Kuvend nga atentati.

Në qershor të 2020-ës, një ditë pasi publikoi videon, Valteri dëshmoi për dy orë në SPAK, duke dhënë informacionet që dispononte për ngjarjen.

“Kam dhënë deponimin tim pranë prokurorit Altin Dumani, presim përfundimin e hetimeve. Nuk na e mbyllën gojën, por do të zbatojmë ligjin. Deklaratat që kam bërë në Kuvend dhe në media i qëndroj, nuk e di nëse do thërritem sërish në SPAK. Duhet të sqaroja të gjitha informacionet që kisha”, deklaroi asokohe Valteri.Kujtojmë që Arjan Ndoja, kandidat i Berishës në Durrës, siguroi votat për të hyrë në shtator në Kuvend.

Atentati ndaj ish-prokurorit Ndoja

Në vitin 2019 një atentat me breshëri automatiku iu bë ndaj ish- prokurorit Arjan Ndoj pranë mbikalimit të Shkozetit. Ngjarja ndodhi më 1 nëntor të vitit 2019 në autostradën Tiranë-Durrës në afërsi të mbikalimit të Shkozetit. Ditën e ngjarjes Prokurori Ndoja ishte në automjet me një person me precedentë penalë, të njohur si i “forti i Sukthit”, Aleksandër Laho (alias Pëllumb Muharremi). i njohur si ‘Rrumi i Shijakut’, dhe me Andi Malokun, ish-punonjës i policisë në komisariatin e Krujës, shofer i prokurorit, i cili mbeti i vdekur.