Policia në Fier ka arrestuar 4 persona dhe ka nisur hetimet për një tjetër, pasi shisnin ilaçe të kontrabanduara në farmacitë e tyre.
Operacioni i quajtur “Medicine” u zhvillua pas disa muajsh hetime. Të arrestuarit janë Shezai Yzeiri, Anxhela Xhemali, Pleçe Byzyka dhe Tereza Plaka. Ndërsa një grua tjetër, 53 vjeçe, po hetohet në gjendje të lirë.
Gjatë kontrolleve në farmacitë dhe shtëpitë e tyre, policia gjeti ilaçe pa pullë fiskale, me vlerë rreth 800 mijë lekë.
Rasti i është dërguar Prokurorisë për veprime të mëtejshme.
NJOFTIMI
Në Fier, gjatë operacionit “Medicine”, u arrestuan shtetasit Shezai Yzeiri, Anxhela Xhemali, Pleçe Byzyka,Tereza Plaka.
Finalizohet pas një pune hetimore disamujore, nga Seksioni për Hetimin e Krimeve Ekonomiko-Financiare, në bashkëpunim me Prokurorinë, operacioni policor i koduar “Medicine”.
Arrestohen 4 administratorë farmacie dhe procedohet 1 tjetër, pasi tregtonin në farmacitë e tyre, ilaçe të kontrabanduara.
Në subjektet dhe në banesat e tyre u gjetën dhe u sekuestruan ilaçe të kontrabanduara, me vlerë rreth 800 000 lekë.
Si rezultat i hetimeve proaktive, të ndjekura për disa muaj, në kuadër të operacionit “Medicine”, me objektiv goditjen e kontrabandës së mallrave, u arrestuan në flagrancë shtetasit Sh. Y., 65 vjeç, A. Xh., 59 vjeçe, P. B., 36 vjeçe dhe T. P., 35 vjeçe. Gjithashtu, nisi procedimi në gjendje të lirë për shtetasen T. A., 53 vjeçe
Nga kontrollet e kryera në farmacitë që administronin këta shtetas, si dhe në banesat e tyre, u gjetën ilaçe pa pullën fiskale nga Agjencia Kombëtare e Barnave dhe Pajisjeve Mjekësore, me vlerë rreth 800 000 lekë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
