Vijon numërimi i votave për qarkun e Lezhës.
Deri në orën 05:35 kishin përfunduar 44 kuti (nga 245) së procesuari dhe në rezultatin e zyrtarizuar edhe nga KQZ, rezultonte se gara ishte shumë e fortë, ku ndahej me një grusht votash.
PD kryesonte me 44,91% të votave, ose 4890 vota, kurse PS e ndiqte me diferencë të ngushtë me 43,23%, ose 4707 vota. Nisma Shqipëria Bëhet renditej e treta me rreth 6% dhe PSD e Tom Doshit me 3,1%.
Sipas formulës zgjedhore (Lezha ka 7 mandate), cila nga dy partitë e mëdha merr edhe një votë më shumë, siguron mandatin e katërt, gjithnjë nëse partitë e vogla nuk e kapin pragun për mandat në përqindje.
Kutia e parë u hap në bashkinë Mirditë. Sipas të dhënave të KQZ-së, në kutinë e parë të Mirditës PD kryesonte me 95 vota, PS me 76 vota dhe ndiqej nga Nisma Shqipëria Bëhet me 16 vota.
