Mbahet sot, në orën 09:30, seanca paraprake për dosjen “Partizani” në GJKKO, pas shtyrjes së seancës së të martës për shkak se avokati i njërit prej të pandehurve ishte në një tjetër gjyq. Pritet të vendoset nëse Sali Berisha, dhëndri i tij Jamarbër Malltezi dhe tre të pandehurit e tjerë kalojnë për gjykim.
Avokati Sokol Hazizi, i cili mbron Fatmir Bektashin, nuk u shkëput nga seanca e dosjes “Plumbi i artë” që kishte nisur që në orën 10:00 të paradites së të martës, megjithëse u prit rreth 60 minuta nga prokurorët, gjykata dhe avokatët e tjerë.
Të pandehur në aferën Partizani janë ish-kryeministri Sali Berisha, dhëndri i tij, Jamarbër Malltezi dhe 3 të tjerë. Prej 24 tetorit të vitit 2024, gati 6 muaj tashmë, seanca vetëm është shtyrë përmes makinacioneve të ndryshme. Në dy herët e fundit avokatët, një herë i Malltezit e më tej i të pandehurit Xhimi Begeja paraqitën raporte mjekësore si të sëmurë.
