Është e tensionuar atmosfera jashtë gjykatës së Stambollit ku qindra mbështetës të kryebashkiakut Ekrem Imamoglu, janë mbledhur dhe brohorasin në mbështetje të tij
Pavarësisht ndalimit të tubimeve, i cili u zgjat deri më 27 mars, mbështetësit e Imamoglu qëndrojnë jashtë gjykatës, ndërsa procedurat me 34 hetuesit dhe 91 të pandehurit (përfshi Imamoglun) pritet të zgjasin gjithë natën.
Siç shihet nga pamjet, qyetarët janë përplasur me policinë si dhe u kanë vënë zjarrin objekteve të ndryshme rrugëve të qytetit.
Sipas raportimeve, forcat e policisë e kanë kthyer pallatin në një fortesë pasi janë përforcuar me 5000 kolegë të tyre nga krahina të tjera të vendit.
Kryetari i Bashkisë së Stambollit Ekrem Imamoglu, i cili u arrestua të mërkurën për “korrupsion” dhe “mbështetje të një organizate terroriste”, mbërriti në Gjykatën e Caglayan në Stamboll pasditen e sotme për t’u paraqitur para prokurorit.
Prokuroria do të vendosë për vazhdimin e masës së paraburgimit të kryebashkiakut, i cili është kundërshtari kryesor i presidentit turk Rexhep Taip Erdogan.
Kryebashkiaku i Stambollit i ka cilësuar akuzat ndaj tij si “imorale dhe të pabaza”, sipas një deklarate të lëshuar sot nga bashkia e qytetit turk.
“Akuzat joetike dhe të pabaza ndaj meje, nga raportet e sajuara deri tek koha e hetimeve, synojnë të cenojnë reputacionin dhe besueshmërinë time”, theksoi kryebashkiaku, sipas deklaratës.
“Ata që qëndrojnë pas kësaj strategjie do të duhet të mbajnë përgjegjësi për veprimet e tyre para gjykatave. Unë do të ngre një padi kundër individëve dhe institucioneve të përfshira në këtë,” paralajmëroi ai. “Ky proces jo vetëm që dëmton reputacionin ndërkombëtar të Turqisë, ai shkatërron gjithashtu besimin te drejtësia dhe ekonomia,” shtoi ai.
Kryebashkiaku shprehet se “ndjen fuqinë e miliona njerëzve” që e mbështesin: “Sido që të ndodhë, do të luftoj për drejtësinë dhe të vërtetën me mjete ligjore deri në fund të jetës sime”, deklaroi ai.
