TIRANË- Para Gjykatës së Tiranës dolën sot tre të arrestuarit pas aksidentit tragjik të 19 marsit ku humbën jetën katër të rinj: Enejd Laçi dhe tre pasagjerët në mjetin e tij, Erild Laçi, 20 vjeç, Enrikejd Kurti, 24 vjeç, dhe Andi Laçi, 22 vjeç.
Gjykata caktoi masën e sigurisë “Arrest në burg” për shoferin e betonieres, Aleksandër Krrashi dhe kushëririn e tij që e ndihmoi të fshihej ndërsa dha detyrim paraqitje për menaxherin e firmës ‘Hel-Jon’, Danjel Koxha.
Zbardhet dëshmia në gjykatë të shoferit Krrashi. Ai ka thënë se ka dalë nga betonierja dhe ka tentuar të hapë derën e makinës së viktimave por “nuk ka mundur dot pasi mjeti ka marrë menjëherë flakë”
Nuk jam larguar menjëherë nga vendi i ngjarjes.U përpoqa maksimalisht t’i ndihmoj. Dera e makinës nuk hapej. Lajmërova edhe një koleg, shofer të një betonierje tjetër, që të vinte për të më ndihmuar me shuarjen e zjarrit. Më pas ai është larguar nga frika e një hakmarrjeje të mundshme” mësohet të ketë thënë ai në gjykatë, informon gazetarja e Report Tv, Keti Banushi.
Edhe kushëriri i tij, Valentin Krrashi ka mohuar të ketë larguar Aleksandrin nga vendi i ngjarjes me qëllim që të fshihej. Ai ka thënë se kishte shkuar për ta ndihmuar dhe më pas e ka dorëzuar në polici.
