Kryeministri Edi Rama ishte në Athinë këtë të dielë për të marrë pjesë në Panairin e Punës. Kreu i qeverisë u ndal edhe tek goditjet e Prokurorisë së Posaçme, teksa theksoi se pushteti i Partisë Socialiste ishte i pari që ia dorëzoi drejtësisë “shpatën e ndëshkimit”.
“Deri tani atë shpatë e mbante pushteti vetë, që nga 1912”, tha Rama.
Sipas Ramës kjo është mënyra e vetme për të luftuar korrupsion seriozisht në mënyrë që vendi të ulet në tryezën e Bashkimit Europian.
“Nuk kemi asnjë rrugë tjetër”, tha ai.
Para bashkatdhetarëve në Greqi, kryeministri Edi Rama u shpreh se Partia Socialiste është shumë e vendosur që të mos e prekë pavarësinë e drejtësisë.
“Është një kohë shumë e shkurtër kjo për të gjykuar. Drejtësia në Shqipëri nuk ka asnjë traditë pavarësie dhe tradita do kohën e vet. Ne jemi shumë të vendosur të mos e prekim pavarësinë e drejtësisë”, tha Rama.
Ai theksoi se qeveria ka mision të udhëheqë Shqipërinë dhe puna e mazhorancës është mision.
