Një ngjarje dramatike ka ndodhur në qytetin e Vlorës një ditë më parë (27 shkurt).
Një vajzë e mitur është rrëzuar nga ballkoni i katit të dytë të shtëpisë së saj, në rrethana që paraprakisht deklarohen si aksidentale nga policia vendore.
Për pasojë, 12-vjeçarja ka marrë plagë serioze në trup dhe kokë. Ngjarja ka ndodhur në lagjen “Pavarësia” të Vlorës, kurse policia nisi menjëherë hetimet pas sinjalizimit dhe referoi materialet në Prokurori për hetime të mëtejshme.
E mitura pas mjekimit të parë në spitalin rajonal, mësohet se është nisur për ndihmë më të specializuar drejt Spitalit të Traumës në Tiranës.
“Specialistët referuan materiale në Prokurori, pasi më datë 27shkurt, një shtetase e mitur, 12 vjeçe, dyshohet se është rrëzuar aksidentalisht nga ballkoni i katit të dytë të banesës, në lagjen “Pavarësia 2”. E mitura u transportua për ndihmë mjekësore në Spitalin e Traumës, Tiranë”, njoftoi policia.
Pista e parë e hetimit është rënia aksidentale nga lartësia prej vogëlushes, por hetimet mbeten ende aktive për zbardhjen e plotë të dinamikës dhe shkaqeve.
