Dy ekspertët mjeko-ligjorë, të cilët u kërkuan seancën e kaluar nga Gjykata e Posaçme për të kryer ekspertimin mjekësor të ish-gjyqtares Pajtime Fetahu, u paraqitën ketë të hënë (10 Shkurt) në GJKKO.
Ata morën detyrat nga togat e zeza dhe bënë betimin në lidhje me aktin që do të kryejnë në ambientet e paraburgimit në Pogradec, për të përcaktuar gjendjen shëndetësore të ish-gjyqtares.
Mbrojtja ligjore e Fetahut ka pretenduar se ajo ka probleme të rënda shëndetësore dhe se qëndrimi në qeli i rrezikon jetën, por ky pretendim do përcaktohet nga ekspertët.
Javën e ardhshme, kur do mbahet seanca e radhës, pritet që dy ekspertët të sjellin edhe konkluzionin e raportit të ekspertimit.
Fetahu mbahet në qelinë e paraburgimit që prej muajit nëntor të vitit 2024, në kuadër të një urdhër-arresti që u lëshua nga SPAK, mbi hetimet për Suel Çelën dhe anëtarët e grupit të tij në Elbasan, për të cilët akuzohet se i ka favorizuar dhe ka pasur komunikime, të zbuluara këto nga përgjimet e platformës së koduar SKY ECC.
SPAK e ka dosjen në fjalë ende në proces hetimor dhe ka kryer dhjetëra arrestime.
