Trupat izraelite kishin filluar të tërhiqeshin nga Gaza, pas marrëveshjes së arritur në Doha për armëpushim dhe lirimin e pengjeve që do duhej të futej në fuqi mëngjesin e sotëm në orën 07:30, me orën tonë lokale. Automjetet e IDF u panë duke u larguar nga Rafah përmes korridorit të Filadelfias, i cili shtrihet përgjatë kufirit jugor me Egjiptin.
Por, pavarësisht kësaj lëvizje të izraelit, Hamasi nuk e ka bërë ende gati listën me emrat e pengjeve. Kryeministri izraelit Benjamin Netanyahu tha se armëpushimi nuk do të fillojë derisa grupi militant palestinez Hamas të publikojë një listë të pengjeve që do të lirohen. Netanyahu shton se “armëpushimi i miratuar është i përkohshëm. Ne rezervojmë të drejtën për t’u kthyer në luftë.”
“Kryeministri udhëzoi IDF-në (Forcat e Mbrojtjes së Izraelit) që armëpushimi, i cili supozohet të hyjë në fuqi në orën 8:30 të mëngjesit, nuk do të fillojë derisa Izraeli të ketë listën e të rrëmbyerve të liruar që Hamasi është zotuar të sigurojë,” tha zyra e tij të dielën.
Zëdhënësi i ushtrisë izraelite, kundëradmirali Daniel Hagari tha se zbatimi i armëpushimit u vonua pasi Hamasi nuk kishte përmbushur detyrimin e tij për t’i dërguar Izraelit listën e pengjeve që do të liroheshin ditën e parë. Ndërsa koha e planifikuar për fillimin e armëpushimit kaloi, tanket izraelite vazhduan të bombardojnë zonat në Gaza.
Në një fjalim të shkurtër televiziv, Hagari tha se kishin urdhëruar ushtrinë të vononte zbatimin dhe se ruante lirinë për të vazhduar sulmet në Rripin e Gazës për sa kohë që armëpushimi nuk kishte hyrë në fuqi.
Hagari tha se ushtria ishte plotësisht e gatshme për të zbatuar armëpushimin, e cila do të hapte rrugën për një fund të mundshëm të luftës 15-mujore, por ishte gjithashtu e gatshme të vepronte në rast se Hamasi shkel kushtet e marrëveshjes.
Hamasi pohoi angazhimin e tij ndaj marrëveshjes së armëpushimit të Gazës, duke thënë se vonesa në zbulimin e emrave të pengjeve që do të liroheshin në fazën e parë ishte për shkak të “arsyeve teknike në terren”.
Marrëveshja mes Izraelit e Hamasit
Marrëveshja e armëpushimit pasoi disa muaj negociatash të ndërmjetësuara nga Egjipti, Katari dhe Shtetet e Bashkuara dhe erdhi pak përpara inaugurimit të Presidentit të zgjedhur të SHBA-së, Donald Trump, më 20 janar .
Faza e parë e saj do të zgjasë gjashtë javë, gjatë së cilës 33 nga 98 pengjet e mbetura – gra, fëmijë, burra mbi 50 vjeç, të sëmurë dhe të plagosur – do të lirohen në këmbim të gati 2,000 të burgosurve dhe të paraburgosurve palestinezë.
Tre pengje femra pritet të lirohen të dielën pasdite përmes Kryqit të Kuq, në këmbim të 30 të burgosurve secila. Pas lirimit të pengjeve të së dielës, tha kryenegociatori amerikan Brett McGurk, sipas marrëveshjes katër pengje të tjera femra të lirohen pas shtatë ditësh, e ndjekur nga lirimi i tre pengjeve të tjera çdo shtatë ditë më pas.
Gjatë fazës së parë, ushtria izraelite do të tërhiqet nga disa nga pozicionet e saj në Gaza dhe palestinezët e zhvendosur nga zonat në veri të Gazës do të lejohen të kthehen.
