Presidenti amerikan në largim Joe Biden njoftoi sot (23 dhjetor) se do të zbusë dënimet e 37 nga 40 personat e dënuar me vdekje në SHBA, duke i kthyer dënimet e tyre me burgim të përjetshëm pa të drejtë apelimi. Vendimi vjen vetëm disa javë përpara se presidenti i sapozgjedhur Donald Trump, një përkrahës i zgjerimit të dënimit me vdekje, të marrë detyrën.
Ky vendim kursen jetën e njerëzve të dënuar për vrasje, duke përfshirë vrasjen e oficerëve të policisë dhe ushtarakëve, dhe atyre të përfshirë në grabitje vdekjeprurëse bankash ose pazare droge, si dhe vrasjet e rojeve ose të burgosurve në objektet federale.
Kjo do të thotë se vetëm tre të burgosur po përballen ende me ekzekutimin. Ata janë Dylann Roof, i cili kreu vrasjen raciste në vitin 2015 të nëntë anëtarëve me ngjyrë të Kishës “Mother Emanuel AME” në Charleston, Karolina e Jugut, bombarduesi i Maratonës së Bostonit në vitin 2013, Dzhokhar Tsarnaev, dhe Robert Bowers, i cili qëlloi për vdekje 11 persona në Pittsburgh’s Life208, sulmi më vdekjeprurës antisemitik në historinë e SHBA-së.
“Unë ia kam kushtuar karrierën time uljes së krimit të dhunshëm dhe sigurimit të një sistemi drejtësie të drejtë dhe efektiv. Sot, unë po i ndryshoj dënimet e 37 nga 40 individëve të dënuar me vdekje, në burgim të përjetshëm pa mundësinë e lirimit me kusht. Këto zbritje janë në përputhje me moratoriumin që administrata ime ka vendosur për ekzekutimet federale, në raste të tjera përveç terrorizmit dhe vrasjeve masive të motivuara nga urrejtja”, thuhet në një deklaratë të Bidenit.
Bideni ishte zotuar se do t’i jepte fund ekzekutimeve federale. Teksa kandidoi për president në vitin 2020, uebfaqja e fushatës së demkratit kishte thënë se ai do të “punonte për të miratuar legjislacionin për të eliminuar dënimin me vdekje në nivel federal dhe për të nxitur shtetet të ndjekin shembullin e qeverisë federale”.
Në fillim të muajit dhjetor, Biden ndryshoi dënime e rreth 1500 personave të burgosur dhe fali 39 të tjerë të dënuar për krime jo të dhunshme.
