Një krim i rëndë brenda familjes është parandaluar mëngjesin e sotëm në Shkodër.
Mësohet se policia ka arrestuar një 29-vjeçar, i cili kërcënonte se do të vriste babain e tij. Ngjarja ka ndodhur në lagjen “10 korriku”, ku i riu e ka dhunuar të atin duke e goditur me mjet prerës. 61-vjeçari u dërgua në spital dhe pas marrjes së ndihmës së parë mjekësore, është larguar në banesë.
Njoftimi i policisë:
Shkodër/Parandalohet një ngjarje kriminale në familje.
Kapet dhe vihet në pranga një 29-vjeçar që dëmtoi babanë e tij, me sende të forta dhe me mjet prerës.
Shërbimet e Komisariatit të Policisë Shkodër, pas njoftimit të marrë se një shtetas, banues në lagjen “10 Korriku”, Shkodër, po dhunonte babanë e tij dhe e kërcënonte atë, për ta vrarë, menjëherë kanë shkuar në adresën e dhënë.
Falë veprimeve të shpejta profesionale të shërbimeve të Policisë u bënë kapja dhe arrestimi në flagrancë i shtetasit R. L., 29 vjeç. Ky shtetas po dhunonte dhe kishte dëmtuar me mjet prerës, babain e tij, shtetasin N. L., 61 vjeç, si dhe e kërcënonte atë, për ta vrarë.
Si pasojë e dëmtimeve, 61-vjeçari u dërgua në spital dhe pas marrjes së ndihmës së parë mjekësore, është larguar në banesë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
