Një person i dyshuar tentoi të vidhte një bankë të nivelit të dytë në qendër të qytetit të Korçës. Sipas raportimeve autori arriti të hyjë në ambientin ku ndodhet bankomati, pasi goditi me forcë derën e jashtme të bankës.
Sistemi i alarmit të bankës u aktivizua menjëherë, duke vënë në lëvizje policinë, e cila mbërriti në vendngjarje. Megjithatë, autori ka arritur të largohet përpara ndërhyrjes së efektivëve.
Policia po vijon hetimet, duke këqyrur vendin e ngjarjes dhe kamerat e sigurisë për të identifikuar autorin e dyshuar. Deri më tani, nuk raportohet për dëme apo shuma të marra. Hetimet janë në vazhdim.
Korçë/Informacion paraprak.
Rreth orës 22:04, një shtetas ende i paidentifikuar ka hyrë me forcë brenda një banke të nivelit të dytë në lagjen nr.3 në qytetin e Korçës, i cili ka shtyrë me forcë derën e jashtme.
Në momentin që ka hyrë brenda ka rënë sinjali dhe menjëherë kanë shkuar shërbimet e Policisë.
Shtetasi që kishte hyrë në ambientet e bankës porsa ka konstatuar Policinë është larguar me shpejtësi pa marrë asnjë gjë nga brenda bankës.
Shërbimet e Policisë janë vënë në ndjekje dhe kanë rrethuar zonën ku dyshohet se është fshehur autori. Grupi hetimor nën drejtimin e Prokurorisë vijon punën, për të bërë të mundur identifikimin e autorit.
