Policia italiane ka arrestuar ditën e djeshme (17 tetor) një shtetas shqiptar që po transportonte me makinën e tij një ngarkesë prej 14 kilogramësh kokainë të cilësisë së mirë.
Kanë qenë patrullat e Policisë Rrugore të Parmës ato që finalizuan aksionin nga një kontroll i rastësishëm, duke dyshuar tek sjellja e shoferit.
Media e vendit fqinj raporton se lënda narkotike do t’u kishte sjellë anëtarëve të grupit kriminal të trafikut, një fitim të paligjshëm të vlerësuar mbi 1 milion euro.
Automjeti me të cilin transportohej kokaina është kapur nga policia në autostradën A1, pranë Fidenzës, gjatë një patrulle të zakonshme autostrade dhe këqyrje të thelluar duke nisur nga shasia e mjetit.
Hetimet e mëtejshme bënë të mundur identifikimin e dallimeve strukturore në bagazhin e makinës, ku ishte krijuar një “fund i rremë” në të cilin ishin fshehur deri në 12 blloqe droge, shkruan “Parma Today”.
Drejtuesi i mjetit, emri i të cilit nuk u publikua, u arrestua në flagrancë për trafik droge dhe i lidhur me burgun e Parmës, në dispozicion të Prokurorisë Publike, e cila koordinon edhe veprimet hetimore.
