3 tetorin e vitit 1990 hyri në fuqi Traktati i Bashkimit mes ish-Republikës Demokratike Gjermane dhe RFGJ-së.
Kremtimet e sivjetshme në Ditën e Bashkimit të Gjermanisë mbahen në Shverin (Schwerin), në kryeqytetin e landit lindor Mecklenburg-Pommerani, drejtuesja e të cilit Manuela Schwesig deklaroi se sot “po festojnë me të gjithë Gjermaninë”, ndërsa theksoi privilegjin e madh që sot, gjermanët jetojnë në liri, paqe dhe demokraci”, pasi për gati gjysmë shekulli Gjermania Lindore dhe ajo Perëndimore ishin të ndara.
E shpallur festë kombëtare, kjo ditë megjithatë, nuk i gjen ndasitë të sheshuara krejtësisht. 35 vjet pas rënies së Murit të Berlinit mes landeve lindore dhe perëndimore ka ende dallime politike, ekonomike dhe sociale, edhe pse dinamika e përgjithshme e rritjes është pozitive.
Shumica e njerëzve në lindje e vlerësojnë gjendjen e tyre ekonomike si të mirë, por ankohen se nuk ndihen të kuptuar siç duhet dhe sa duhet nga politika.
Gjermano-lindorët rezulton të kenë më pak besim tek institucionet demokratike sesa gjermanët në Perëndim dhe në landet e reja ka më pak njerëz që janë të kënaqur me sistemin politik të Republikës Federale të Gjermanisë. Këtë e treguan edhe zgjedhjet në Tyringi, Saksoni dhe Brandenburg, në të cilat partia ekstremiste e djathtë Alternativa për Gjermaninë (AfD) fitoi 29 deri në 33 për qind të votave, ndërsa partia Aleanca Sahra Wagenknecht (BSW) fitoi 12 deri 14 për qind të tyre.
Përfaqësuesi i qeverisë për Gjermaninë Lindore, Carsten Schneider, i cili është nga landi lindor i Tyringisë, ka analizuar së bashku me autorë të shumtë të shquar zhvillimin ekonomik dhe social të landeve lindore, në raportin e tij për gjendjen në lindje, dilte në përfundimin se Gjermania është e lirë, e bashkuar dhe e papërfunduar.
