Në Kryesinë e Kuvendit po zhvillohet një takim i përbashkët mes kryetares së Parlamentit, Elisa Spiropali me drejtuesit e Institucioneve të Pavarura lidhur me mënyrën e raportimit dhe monitorimit.
Të ftuar në këtë tryezë ambasadorët e BE-së, SHBA-së dhe Britanisë në një zë përcollën mesazhe të rëndësishme për respektimin e institucioneve të pavarura por dhe forcimin e rolit të Parlamentit në llogaridhënie e transparencë.
Ndërkombëtarët e quajtën të rëndësishëm rolin e komisionit antikorrupsion në realizimin e reformave të cilat janë tepër të rëndësishme në këtë moment kur Shqipëria është në një fazë kritike dhe po punohet shumë për tu hapur shumë shpejt negoicatat për në BE.
Ambasadori i BE-së Silvio Gonzato kishte tre mesazhe për Parlamentin dhe vuri theksin dhe tek zbatimi i vendimeve të Gjykatës Kushtetuese nga Parlamenti.
Vendimet e Gykatës kushtetuese duhet të respektohen siç nxirren nga ato dhe kjo është thelbësore në një shtet demokratik. Për reformën në drejtësi parlamenti mund të lozë një rol kyç për mos kthimin pas të reformave por për të implementuar më tej, në harmoni reformat me të gjitha detyrimet që Shqipëria ka marrë në rrugën e BE-së. Këto reforma shoqërohen nga përpjekja për të parandaluar korrupsionin e krimin e organizuar e krimin në qeveri. Komisioni i Antikorrupsionit që ju keni themeluar tashmë është shumë i rëndësishëm në këtë drejtim” tha Gonzato
Edhe ambasadori i Mbretërisë së Bashkuar, Zëvendës Drejtuesja e Komanduar e Misionit të ShBA theksuan se fuqizimi i këtyre institucioneve është kyç për integrimin në BE.
Nick Abbott: “Institucionet e pavarura duhet të fuqizohen. Duhet llogaridhënie dhe transparencë nga institucionet’ tha Abbot
Kathryn Hammond: ‘Mbështesim ato iniciativa që ruajnë pavarësinë e gjyqësorit dhe janë gjithëpërfshirëse. Institucionet e pavarura duhet të forcojnë llogaridhënien dhe transparencën. SHBA është e gatshëm të mbështesë institucionet pavarura.
Kryetarja e Kuvendit tha në fjalën e saj se do të mbështesë institucionet e pavarura. Spiropali ftoi opozitën për të marrë pjesë në Komisionet e Posaçme.
‘Kuvendi ka dhënë dhe do të japë institucionalisht dhe publikisht mbështetjen e nevojshme. Mbështetja jonë ka qenë dhe do të jetë ligjore. Kuvendi ka vullnet të plotë dhe është i hapur të miratojë inictiava të reja ligjore. Kuvendi është një derë e hapur për të gjithë ju.
Askush nuk mund të hyjë në veprimtarinë e institucioneve të pavarura. Shqipëria europiane kërkon institucione që veprojnë me përgjegjshmëri. Çdo qytetar shqiptar meriton të marrë shërbim europian. Kuvendi do të japë mbështetjen për Komisionet e Posaçme, dhe se nuk do të prekim e ndërhyjmë tek Institucionet e pavarura. Vetëm do t’ju inkurajojmë. Opozita do të marrë vendin e saj në këto komisione. I papranueshëm raporti burokratik mes Kuvendit dhe institucioneve tuaja. Shpresoj në një dimension të ri të këtyre marrëdhënieve.’- tha Spiropali.
