Opozita në orën 12:00, të ditës së sotme do të jetë në shesh për të mbajtur protestën e paralajmëruar më 18 dhjetor të vitit të shkuar, kur Arta Marku u zgjodh në postin e kryeprokurores.
Kreu i opozitës, Lulzim Basha ka paralajmëruar se ky marshim në dukje do të jetë paqësor, dhe këtë e dëshmon edhe fakti se ai ka thënë që do të marr pjesë në protest me familjen e tij.
Të njëjtën gjë ka përsëritur, edhe krahu tjetër i opozitës, kryetarja e Lëvizjes socialiste për Integrim, Monika Kryemadhi, kur thotë se garanton shqiptarët të marrin pjesë pasi asgjë e keqe nuk do të ndodh, përvec një të mire: Rrëzimi i kryeministrit Rama.
Itenerari i protestës:
Kreu i opozitës, sipas planit të përgatitur, do të dalë nga selia blu dhe do të ecë përgjatë bulevardit ‘Zhan Dark’, për të mbërritur tek godina e Hotel Dajtit, së bashku me njerëzit që do e shoqërojnë dhe me pankartat. Tek kjo godinë, Basha do i bashkohet qytetarëve që do të vijnë nga sheshi ‘Skëndërbej’, për të marshuar më pas së bashku drejt Kryeministrisë.
Një tjetër itinerar do të jetë nga selia e Lëvizjes Socialiste për Integrim. Njësoj si PD edhe anëtarët e Lëvizjes Socialiste për Integrim pikëtakimin do e kenë në sheshin ‘Skëndërbej’, ndërsa kryetarja e LSI-së, Monika Kryemadhi do të vijë nga selia, për t’iu bashkuar protestuesve.
Protesta do të shoqërohet nga fjalime politike që do të mbyllen nga Lulzim Basha. Qytetarët nga rrethet do të vijnë me autobusë, të cilët do të kenë pikëmbërritje të ndryshme, larg qendrës së kryeqytetit por ata do të do të mblidhen tek sheshi ‘Skëndërbej’, për marshimin rreth orës 12 drejt Kryeministrisë.
Kjo protestë është parashikuar të zgjasë 3-4 orë, me një fjalim përmbyllës nga Basha.
Përgatiti: AlpeNews.al
