Ministri i Jashtëm rus Sergei Lavrov, duke iu përgjigjur një pyetjeje në lidhje me dërgimin e mundshëm të raketave amerikane me rreze të gjatë veprimi në Ukrainë, paralajmëroi Shtetet e Bashkuara të mërkurën që të mos bëjnë shaka me “vijat e kuqe” të Rusisë.
Lavrov tha se SHBA-ja po hubiste ndjenjën e parandalimit të ndërsjellë që kishte mbështetur ekuilibrin e sigurisë midis Moskës dhe Uashingtonit që nga Lufta e Ftohtë dhe se kjo ishte e rrezikshme.
Ai po komentonte një raport të Reuters se SHBA është afër një marrëveshjeje për të furnizuar Ukrainën me raketa lundrimi me rreze të gjatë JASSM që mund të arrijnë thellë brenda Rusisë – për të cilën presidenti ukrainas Volodymyr Zelenskiy ka lobuar.
“Nuk do të befasohem nga asgjë – amerikanët tashmë e kanë kaluar pragun që i caktuan vetes. Ata janë duke u nxitur dhe Zelenskiy natyrisht e sheh këtë dhe përfiton nga kjo,” i tha Lavrov një intervistuesi televiziv rus.
“Por ata duhet të kuptojnë – ata po bëjnë shaka me linjat tona të kuqe këtu. Ata nuk duhet tëtallen me linjat tona të kuqe.”
Presidenti Vladimir Putin e ka paralajmëruar vazhdimisht Perëndimin që nga fillimi i atij që ai e quajti “operacionin e tij special ushtarak” në Ukrainë në vitin 2022, që të mos përpiqet të pengojë Rusinë, e cila ka arsenalin më të madh në botë të armëve bërthamore.
Por Uashingtoni dhe aleatët e tij kanë rritur ndihmën ushtarake për Ukrainën, duke përfshirë sigurimin e tankeve, raketave të avancuara dhe avionëve luftarakë F-16.
Kjo ka bërë që disa politikanë perëndimorë të sugjerojnë se retorika bërthamore e Putinit është një bllof dhe se SHBA dhe NATO duhet të bëjnë gjithçka për të ndihmuar Ukrainën të fitojë luftën. Zelenskiy ka thënë se inkursioni i Ukrainës në Rusi, i nisur më 6 gusht, bën një tallje me vijat e kuqe të Putinit.
Lavrov tha se Uashingtoni e dinte se ku qëndronin këto kufij, por ishte gabim nëse besonte se pasojat e çdo përshkallëzimi të luftës në Ukrainë do të vuante kryesisht nga Evropa.
“Ata kanë një bindje gjenetike se askush nuk do t’i prekë,” tha Lavrov. Kjo, tha ai, minoi të gjitha parimet që kishin mbështetur stabilitetin strategjik me Uashingtonin që nga koha sovjetike.
“Kjo ndjenjë e parandalimit të ndërsjellë – për disa arsye ata kanë filluar ta humbasin. Kjo është e rrezikshme,” tha ai.
