Ish-kryeministri Sali Berisha ka qenë i ftuar mbrëmjen e sotme në studion e Zonë e Lirë në Tv Klan dhe deklaroi se dhe në komunizëm është mbjellë kanabis.
Berisha deklaroi se në vitet ’60 i dërgonin në fusha për të korrur lulëkuqe, nga e cila nxirrej opium dhe eksportohej me pas.
Po ashtu ish-kryeministri deklaroi se më drogë dhe duhan është bërë kontrabandë.
“Enver Hoxha na çonte për të mbledhur lulëkuqe, i tregtonte jashtë edhe Kanabis, drogë ka çuar jashtë”, tha Berisha.
I pyetur për paratë se shkonin në arkën e shtetit apo në xhepat e disave, Berisha u përgjigje: E vështirë të them se ku shkonin, kam dëgjuar se shkonin për mbrojtjen e tij.
Për ish-Kryeministrin Sali Berisha, fatkeqësia më e madhe për popullin shqiptar është reagimi dhe qëndrimi ndaj korrupsionit qeveritar.
Ai tha se përvojat e kaluara të Shqipërisë duhet të shërbejnë për të reaguar më mirë ndaj rasteve korruptive dhe të mos qëndrojnë indiferent.
“Ka një fatkeqësi të madhe për ne. Fatkeqësia më e madhe e jona është qëndrimi ndaj korrupsionit. Mendoj se nëna e të këqijave për ne si komb, por me një reflektim të thellë në kulturën tonë, është qëndrimi ndaj korrupsionit. Nuk do bëheni dot ata që duam të jemi kurrë, nëse ne si njerëz nuk i mëshojmë qëndrimit ndaj korrupsionit”, tha ish-Kryeministri Sali Berisha.
Ish-Kryeministri ka treguar edhe fatkeqësinë më të madhe në historinë e tij si politikan kur drejtonte Partinë Demokratike. Firmat piramidale në vitet ’97 janë fatkeqësia më e madhe për të dhe PD-në.
“Piramidat, janë një fatkeqësi e madhe e PD dhe Sali Berishës. Sali Berisha po të donte mund t’i kthente gjithë paratë. Por, këtë nuk mund ta bëja. Qëndrimi për kohë të gjatë në pushtet… duhet që të tjerët të vijnë pas teje. Nuk kam qenë asnjëherë i apasionuar pas qëndrimeve afatgjata në pushtet”, deklaroi Sali Berisha.
