Dy anëtarë të stafit të fushatës së Donald Trump patën një përplasje verbale dhe fizike të hënën me një zyrtar në Varrezat Kombëtare të Arlingtonit, ku ish-presidenti mori pjesë në një ceremoni të vendosjes së kurorave, raporton NPR.
Një burim me njohuri për incidentin tha se zyrtari i varrezave u përpoq të pengonte stafin e Trump që të filmonin dhe fotografonin në një seksion ku janë varrosur viktimat e fundit amerikane
Burimi tha se zyrtarët e Arlington e kishin bërë të qartë se vetëm anëtarët e stafit të varrezave do të autorizoheshin të bënin fotografi ose filmim në zonë, e njohur si Seksioni 60.
Kur zyrtari i varrezave u përpoq të pengonte stafin e fushatës së Trump të hynte në Seksionin 60, stafi i fushatës abuzoi verbalisht dhe e shtyu zyrtarin mënjanë, sipas burimit.Trump mori pjesë në një ngjarje për të shënuar përvjetorin e tretë të një sulmi vdekjeprurës ndaj trupave amerikane në Afganistan, ndërsa forcat amerikane u tërhoqën nga vendi; 13 anëtarë të shërbimit amerikan u vranë në sulm. Fushata e Trump ka fajësuar Presidentin Biden dhe zv.Presidenten Harris, tani kandidate demokrate për president, për tërheqjen kaotike.Në një deklaratë për NPR, Steven Cheung, zëdhënësi i fushatës së Trump, hodhi poshtë me forcë nocionin e një përleshjeje fizike, duke shtuar: “ne jemi të përgatitur të publikojmë pamjet nëse bëhen pretendime të tilla shpifëse”.
“Fakti është se një fotograf privat u lejua në ambientet dhe për çfarëdo arsye një individ pa emër, që vuante qartë nga një episod i shëndetit mendor, vendosi të bllokojë fizikisht anëtarët e ekipit të Presidentit Trump gjatë një ceremonie shumë solemne”, tha Cheung në deklaratë.Në një deklaratë për NPR, Varrezat Kombëtare të Arlington tha se “mund të konfirmojë se ka pasur një incident dhe një raport është paraqitur”.
“Ligji federal ndalon fushatën politike ose aktivitetet e lidhura me zgjedhjet brenda Varrezave Ushtarake Kombëtare të Ushtrisë, përfshirë fotografë, krijues të përmbajtjes ose çdo person tjetër që merr pjesë për qëllime ose në mbështetje të drejtpërdrejtë të fushatës së një kandidati politik”, thuhet në deklaratë
