Aventurat për eksplorim të turistëve në vendet më të rrezikshme të globit nuk reshtin, edhe pse shpesh kthehen në drama dhe tragjedi.
Si ajo që ka ndodhur në akullnajat e Islandës, teksa pamjet e frikshme u kapën nga një dron në fluturim mbi vendngjarje, ku u shemb një bllok i tërë akulli në shpellën ku po eksploronin një grup turistësh.
Bilanci ishte të paktën një i vdekur dhe 2 të zhdukur. Mediat raportojnë se po vazhdojnë kërkimet për dy persona të zhdukur në shpellën e akullit, të dielën e 25 Gushtit.
Pamjet me dron tregojnë shërbimet e urgjencës në veprim në skenën e shembjes së shpellës së akullit, e publikuar nga “La Repubblica”.
Sipas autoriteteve, shpella e akullit po eksplorohej nga turistët në momentin që blloku u shkëput. Viktimat ishin pjesë e një grupi prej 25 anëtarësh nga vende të ndryshme, të cilët ndodheshin në shpellën natyrore, e vendosur nën një akullnajë, kur ndodhi aksidenti.
Një person u shpall i vdekur menjëherë pas përplasjes, ndërsa ekipet e shpëtimit po kryejnë një kërkim të gjerë dhe të vështirë për dy individë që besohet se kanë mbetur të bllokuar.
