Të paktën një person është vrarë në Rusi pasi të burgosurit që pretendojnë se janë militantë të Shtetit Islamik (ISIS) goditën me thikë rojet e sigurisë dhe morën pengje brenda një burgu të sigurisë së lartë në jugperëndim të vendit.
“Gjatë një seance të një komisioni disiplinor, të dënuarit morën peng personelin e institucionit penal”, thuhet në njoftimin e shërbimit të burgjeve.
Sajti rus i lajmeve ‘Mash’ ka publikuar një video ku shfaqen të paktën dy agresorë, ku njëri deklaronte se ishin “muxhahedinë” dhe pretendonte se kishin marrë nën kontroll burgun.
Katër zyrtarë me uniformë mund të shihen të plagosur dhe të mbuluar në pellgje gjaku, ndërsa një tjetër shihet i ulur pranë një porte, teksa militantët i mbajnë thikën në qafë.
Terroristët e ISIS kërkonin një helikopter dhe rreth 2 milionë dollarë për t’u arratisur jashtë vendit. Incidenti në burgun rus ka vijuar për më shumë se gjashtë orë, me terroristët që morën kontrollin e kompleksit dhe refuzuan të ndaleshin.
Për të hyrë në negociata me ta autoritetet ruse organizuan transferimin e një myftiu nga xhamia lokale në burg, por, rreth orës 16:00, Garda Kombëtare Ruse (Rosgvardia) njoftoi se incidenti në burgun IK-19 në Volgograd kishte përfunduar, me snajperët që vranë katër sulmuesit e ndaluar, ndërsa të gjithë pengjet u liruan.
Tre punonjës të burgut ndodhen në kujdes intensiv, ndërsa roja i burgut Roman Ponomariov është në “gjendje jashtëzakonisht të rëndë”.
Kreu i burgut, Andrei Deviatov, është plagosur rëndë dhe ndodhet gjithashtu në terapi intensive. Një tjetër oficer, I identifikuar si Alexei Lygin, ka marrë plagë me thikë në fytyrë dhe një frakturë të kafkës, ndërsa gjendja e tij shëndetësore konsiderohet kritike, ndërsa i burgosuri Aleksandër Bojko, mbeti i plagosur në bark.
Uebsajtet ruse kanë publikuar emrat e katër sulmuesve të dyshuar dhe raportojnë se ata janë Ramzdin Tosef, Rustamjon Navruzi, Nazirjon Tosov dhe Temur Hushinov nga Uzbekistani e Taxhikistani, që ishin dënuar për krime që lidhen me trafikun e drogës.
Incidenti vendosi në alarm edhe Presidentin Vladimir Putin, i cili thirri një takim të Këshillit të Sigurisë duke kërkuar nga udhëheqësit një vlerësim të situatës.
Burgu ku ka ndodhur ngjarja njihet si kolonia penale IK-19 në Surovikino dhe mund të mbajë më shumë se 1200 të burgosur meshkuj. Ky burg klasifikohet si një koloni penale e “regjimit të ashpër”.
