Ministria e Mbrojtjes ka bërë një përditësim lidhur me situatën e zjarreve në vend për 24 orët e fundit. Mësohet se në 24 orët e fundit janë shuar 13 nga 20 vatra zjarri të evidentuara, përfshirë zjarrin në fushën e mbetjeve në Vlorë.
Bëhet me dije se zjarret vijojnë të jenë aktive në fshatin Zogaj, bashkia Tropojë dhe në fshatin Hoten, bashkia Vau Dejës, të cilat nuk paraqesin rrezik për zonat e banuara. Ndërkohë zjarri në fshatin Mal-Shëngjin, bashkia Lezhë, u përhap dje, por ndërhyrja nga ajri shmangu rrezikun për qytetarët.
Zjarri në fshatin Zavalinë në Elbasan, po mbahet nën kontroll me ndihmën e Forcave të Armatosura. Gjithashtu puna vijon edhe në kodrat e liqenit të Viroit në Gjirokastër dhe në fshatin Lozhan, në Maliq.
Njoftimi i plotë:
Në 24 orët e fundit ka vijuar pa ndërprerje puna për shuarjen e zjarreve në disa zona të vendit. Janë shuar 13 vatra zjarri nga 20 të evidentuara në 24 orët e fundit, mes tyre edhe zjarri në fushën e mbetjeve në qytetin e Vlorës.
Por vijojnë të jenë aktive sot zjarret në:
fshatin Zogaj, bashkia Tropojë, I cili është izoluar plotësisht në kufi me bashkinë Has dhe vijon aktive me intesitet të ulët në veri të lagjes Hajdarmataj. Strukurat e pushtetit vendor të mbështetura nga Forcat e Armatosura po vijojnë operacionin në atë zonë. Por punohet për shuarjen e vatrës në fshatin Hoten, bashkia Vau Dejës. Zjarri ka intensitet të ulët dhe nuk paraqet rrezik për zonat e banuara.
Zjarri në fshatin Mal-Shëngjin, bashkia Lezhë, i cili është aktiv prej disa ditësh, pasditen e djeshme u përhap menjëherë duke vënë në rrezik bizneset dhe zonat e banuara. Pas ndërhyrjes nga ajri është bërë e mundur shmangia e rrezikut për qytetarët.
Sot vijon operacioni nga toka dhe ajri.
Vijon të jetë aktiv zjarri në fshatin Zavalinë, bashkia Elbasan, ku janë angazhuar në aksion strukturat e pushtetit vendor të mbështetura nga Forcat e Armatosura.
Puna Po vijon edhe në dy vatra të tjera, në kodrat e ligenit të Viroit, në Gjirokastër dhe fshatin Lozhan, bashkia Maliq.
Mirënjohje për të gjitha forcat operacionale të angazhuara në këto operacione për shuarjen e zjarreve, një pjesë e të cilave shkaktuar qëllimisht nga dora e njeriut. Ju bëjmë thirrje banorëve të bëjnë kujdes! Ligji është i qartë dhe i rreptë për ata që ndezin zjarre!
