– AMP po zhvillon një operacion pas disa muajsh hetime, për të goditur një skemë korrupsioni në radhët e policisë kufitare. Pas kërkesës së AMP gjykata e Tiranës ka vendosur arrest në burg për efektivin e rinasit: Briken Tereziu, por masa ende nuk është ekzekutuar. Masa arrest me burg i komunikohet në qeli edhe Eneo Sulejmanit. Ky i fundit ndodhet në burg pasi u kap me 1 kg kokaine kohë më parë.
Gjithashtu gjykata ka vendosur masën arrest shtëpie për 3 efektive policie të cilët janë Sokol Xhika, Aris Drini, Ermal Mesi, të tre efektive në Rinas. Ndërkohë Detyrim paraqitjeje është vendosur për 4 të tjerë: Enkis Aliaj, Argil Hasa, Ylli Prenci, dhe Rei Shenjtolli. Sipas burimeve 8 punonjës të tjerë janë nën hetim.
Veprimtaria kriminale dyshohet se është kryer nga marsi 2023 deri në mars 2024. Dyshohet se agjencia në emër të Sulejmanajt, “Bus Albania” priste bileta avioni për persona të ndryshëm që nuk udhëtonin dot drejt BE. Dyshohet gjithashtu se Eneo Sulejmanaj kishte kontakte me efektivin Briken Tereziu. Ky i fundit përmes kolegëve të tij lejonin udhëtimin e personave të jashtëligjshëm për të kaluar kufirin përmes shumave monetare. Briken Tereziu është shpallur në kërkim pasi ende nuk është arrestuar. Të gjithë efektivët akuzohen për shpërdorim detyre. Ndërsa Sulejmanaj akuzohet për korrupsion aktiv i personave që ushtrojnë funksione publike.
Të njëjtat burime shtojnë se këta persona në bashkëpunim me Eneo Sulejmani kanë bashkëpunuar të fusin klandestinë drejt BE. Aktualisht vazhdojnë hetimet edhe në gjendje të lirë edhe për 8 punonjës policie të tjerë, me detyrë Ndihmës specialist, kontrollor: Seksioni i kufirit, ne Komisariatin e Policise Kufitare Aeroporti Rinas, të dyshuar të përfshirë në të njëjtin aktivitet kriminal.
