Pas dy orësh marrjeje në pyetje, ministri i Mbrojtjes Niko Peleshi ka dalë nga ambientet e Prokurorisë së Posaçme kundër Korrupsionit dhe Krimit të Organizuar.
Peleshi u paraqit i vetëm, pa avokat, në ambientet e SPAK, pasi kishte marrë një fletëthirrje për t’u paraqitur në orën 10:00. Nuk dihet ende çështja për të cilën Peleshi u thirr nga Prokuroria e Posaçme, teksa në dalje ai nuk ka dhënë detaje.
“Për arsye të pozicionit të punës”, tha ministri Peleshi për gazetarët pas daljes nga ambientet e SPAK.
Me herët Peleshi ka mbajtur edhe detyrën e zv.kryeministrit në periudhën 2013-2017. Gjithashtu në periudhën shtator 2017-janar 2019, Peleshi ka shërbyer si ministër i Bujqësisë dhe Zhvillimit Rural, teksa në vitin 2020, mori detyrën e Minitrit të Mbrojtjes.
Kujtojmë se më herët, ai është përballur me institucionet e drejtësisë, lidhur me skandalin e ‘Silicon Mix’, në kohën kur Peleshi ka qenë ministër i Bujqësisë.
Në vitin 2019, Top Channel ka denoncuar se si një sasi e madhe pesticidi me emrin ‘Silicon Mix’ po shitej ne Shqipëri si pleh kimik. Por vetë fermerët e blinin atë për të vrarë insektet që dëmtonin qershitë. ‘Silicon Mix’ ishte bllokuar nga AKU, por me një urdhër të Peleshit, bllokimi u hoq dhe në treg u shitën 4600 kilogram kimikat.
