sËhtë zbardhur ditën e sotme nga mediat dëshmia e Xhemal Lokës, bashkëshort i Bedrie Loka, e cila pak ditë më parë u vetëvra me fostoksinë.
Para autoriteteve të policisë ai ka pohuar se bashkëshorten e donte si nënën e fëmijeve të tij, teksa nuk ka qenë ai arsyeja pse e ndjera zgjodhi të vetëvritej.
“Nuk e kam dhunuar gruan. Bashkëshorten e kisha për shtëpi, nuk e çova drejt vetëvrasjes. Vetëvrasja e saj erdhi si pasojë e postimeve të TikTok-ut. Kemi pasur konflikte si çdo familje, por gruan e doja. E kam dashur si nënën e fëmijëve të mi. Në mëngjes kam parë që kishte pirë helm dhe e kam çuar me shpejtësi drejt spitalit të Durrësit për ta shpëtuar. Gruan time e dua dhe nuk e kam dhunuar”, ka deklaruar Xhemal Loka, bashkëshorti i 41-vjeçares, e cila i dha fund jetës duke pire fostoksinë.
Kujtojmë se ndaj të ndjerës në rrjetin social Tik Tok ishin hapur llogari me foton e saj dhe shkrime të cilat ishin ofenduese dhe preknin rëndë moralin e saj.
Nga ana tjetër, të afërm të viktimës kanë hedhur dyshime se shkak i vetëvrasjes nuk ishin adresat e Tik Tok-ut por dhuna e ushtruar nga bashkëshorti i saj.
Xhemal Loka ka qenë në burg në Francë për disa vite me radhë dhe pas lirimit nga burgu u kthye në shtëpi për t’u nisur sërish ilegalisht, sipas familjarëve të tij, drejt Greqisë për të punuar. Ai u kthye më 27 dhjetor në shtëpi për festa, por sipas dëshmisë së njërit prej fëmijëve që atë ditë ka nisur keqtrajtimi i nënës.
Ndërkohë në celularin e sekuestruar të Xhemal Lokës u gjet një video me fyerje dhe kërcënime që ai i dërgonte gruas së tij.
