Gërmimet për zbulimin e eshtrave të ushtarëve grekë po kryhen nën masa të rrepta sigurie, duke mos lejuar asnjë person të paautorizuar t’i afrohet vendit, ku operohet në zbulimin e eshtrave.
Forca ruajtëse të Policisë së Shtetit apo dhe Ministrisë së Mbrojtjes, qëndrojnë në ruajtje 24 orë pa pushim, me qëllim mosafrimin e asnjë elementi tjetër, që nuk rezulton pjesë e grupeve të përbashkëta të inspektimit.
Bëhet fjalë për një sipërfaqe prej gjysmë hektarë në fshatin Dragot të Tepelenës, ku kërkimet nisën fill pas marrëveshjes Shqipëri-Greqi të arritur nga bisedimet e dy ministrave të Jashtëm në qytetin e Korçës.
Deri tani, mësohet se janë zbuluar katër varre të ushtarëve grekë, ndërkohë që është punuar për të pestin dhe të gjashtin.
Moti mjaft i ftohtë, që ka mbizotëruar ditën e djeshme, nuk ka favorizuar shumë ecurinë e punimeve në terren, pasi është punuar me shumë kujdes, me qëllim që mos të dëmtohen eshtrat e sidomos kafkat.
Grupin e inspektimeve në terren e udhëheq një specialist grek ish-ushtarak, i cili është marrë edhe me zhvarrime në zona të tjera të Greqisë apo jashtë saj.
Ende nuk është e qartë nëse eshtrat i përkasin ushtarëve grekë apo atyre italianë, ndonëse për këta të fundit ka pasur një mision gjatë viteve ’60 për tërheqjen e eshtrave të tyre.
Grupi në terren përbëhet nga 12 persona, prej të cilëve shumica shqiptarë, ku katër prej tyre punëtorë krahu, që merren me gërmimet me kazmë e lopatë, shefi i shërbimeve publike në Bashkinë e Tepelenës si dhe përfaqësues nga Ministria e Jashtme dhe asaj e Mbrojtjes.
Ndërkaq, mesditën e djeshme, në parcelën e hapur për gërmimin e varreve ku gjenden eshtrat e ushtarëve grekë të rënë në luftën italo-greke gjatë Luftës së Dytë Botërore, ka qenë edhe konsulli grek i Gjirokastrës, Vasileos Tolos, i cili ka qëndruar jo më tepër sesa 30 minuta.
Me gjithë interesimin e mediave greke dhe shqiptare, të cilat kanë qenë në terren, konsulli grek nuk ka dhënë asnjë deklaratë në lidhje me procesin e gërmimeve në Dragot.
Ndërkohë, banorë të zonës, thonë se varret e ushtarëve grekë gjenden në pjesë të largët të Ballabanit në Përmet. Xhezo Canaj, 67 vjeç, shprehet se në Dragot kanë rënë ushtarë italianë, ndërsa numri i ushtarëve grekë është i pakët.
Ai kujton kur ka qenë i ri në moshë, sesi misioni italian i kërkimit të varreve të ushtarëve në vitet ’60 në fushën e Dragotit, aty ku sot janë hapur parcelat për kërkimin e ushtarëve grekë, zbuloi shumë varre, të cilat i përkisnin ushtrisë italiane.
“Ata, mesa mbaj mend, ishin me medaljone dhe u transportuan me kafshë në atë periudhë”,- tregon Canaj.
Ndërsa një tjetër banor i zonës, Etem Melaj, shprehet se ushtarë grekë mund të ketë në zonë tjetër dhe jo në Dragot. Pas gërmimeve në fushën e Dragotit, kërkimet do të vijojnë në zonat e tjera të Këlcyrës dhe Përmetit, por ndërkohë që këto zona deri më tani, përbëjnë sekret.
