Zyrtarët e qeverisë së Mbretërisë së Bashkuar do të takohen me homologët e tyre në Turqi për të diskutuar mbi rreziqet e turizmit kozmetik pasi një grua e re britanike vdiq pas një ‘ngritjeje braziliane të të pasmeve’ prej 3200 £ në një spital privat atje.
Melissa Kerr, 31 vjeç, u shtrua në spitalin Medicana Kadikoy në Stamboll në vitin 2019 dhe vdiq pas procedurës për të mbledhur yndyrë dhe për ta injektuar atë në të pasmet e saj.
Procedura mbart një shkallë vdekjeje të paktën 10 herë më të lartë se shumë procedura të tjera kozmetike. Mjeku ligjor i lartë i Norfolk, Jacqueline Lake, tha se zonjës Kerr, nga Denton, Norfolk, iu dha vetëm ‘informacion i kufizuar në lidhje me rreziqet dhe shkallën e vdekshmërisë’ të lidhur me operacionin. Mjeku ligjor i shkroi Departamentit të Shëndetësisë dhe Kujdesit Social rreth shqetësimeve pas një hetimi të publikuar në shtator të këtij viti.
Ajo shkroi: ‘Jam e shqetësuar që pacientët që udhëtojnë në Turqi për këtë procedurë nuk po ndërgjegjësohen për rreziqet dhe shkallën e lartë të vdekshmërisë që lidhet me këtë operacion.’
Zonja Lake ngriti gjithashtu shqetësime se nuk kishte kontrolle ose kufizime në lidhje me një operacion të tillë. Shqetësimet e saj iu drejtuan sekretarit të atëhershëm të shëndetësisë, Steve Barclay, dhe që atëherë është marrë një përgjigje nga Maria Caulfield, ministre për shëndetin mendor dhe strategjinë e shëndetit të grave.
Në përgjigjen e saj këtë muaj, zonja Caulfield tha: ‘Zyrtarët e mi do të vizitojnë Turqinë së shpejti për t’u takuar me homologët e tyre. “Synimi është të diskutohet kuadri rregullator dhe mbrojtjet që janë në fuqi për shtetasit e Mbretërisë së Bashkuar, dhe të identifikohen fushat konkrete ku autoritetet e MB dhe turke duhet të punojnë së bashku për të reduktuar rreziqet për pacientët në të ardhmen”, tha ajo.
