Detaje të reja dalin në dritë pas plagosjes me armë zjarri mbrëmjen e shkuar në Bathore të Kamzës. Mësohet se në vendin e ngjarjes janë gjetur 3 gëzhoja, ndërsa i plagosuri 46-vjeçar Agim Hida ka marrë dy plumba në këmbë.
Mësohet se ky i fundit ka qenë duke pirë kafe në lokalin ku edhe ndodhi ngjarja ku dy autorët që lëviznin me motor kanë ndaluar ndërsa njëri prej tyre i është afruar afër dhe e ka qëlluar në këmbë. Autorët dyshohet se e njihnin Agim Hidën dhe e kanë pasur objektivin e qartë pasi dinin edhe lëvizjet e tij, por edhe lokalin ku Hida e frekuentonte shpesh.
Identifikimi i autorëve rezulton të jetë i vështirë për grupin hetimor për shkak se ata kanë qenë të dy të maskuar ku njëri kishte rolin e qitësit dhe tjetri drejtuesi i motorit që më pas përdorën për tu larguar.
Mësohet se vëllai i të plagosurit Agim Hida, Flamur Hida vite më parë akuzohej se ka vrarë një italian në zonën e Yzberishtit. Ndërkohë i plagosuri ende nuk ka dhënë një dëshmi lidhur me ngjarjen që mund të ndihmonte grupin hetimor për zbardhjen e kësaj ngjarje.
