Në kuadër të “Tetorit Rozë”, muajit me aktivitete për sensibilizimin e grave të kryejnë kontrolle për evidentimin e kancerit të gjirit,
Në Fier u mbajt sot një takim i gjerë ku morën pjesë ministrja e Shëndetësisë dhe Mbrojtjes Sociale, Albana Koçiu, deputetë, drejtues vendorë dhe gra në moshë e të reja. Ministri i Brendshëm Taulant Balla apeloi për kontrolle të vazhdueshme që duhet kryer në kohë, për të fituar betejën me këtë sëmundje, që brenda vitit të kaluar mori 700 jetë. Ai foli për rritje të ndërgjegjësimit.
Duke u ndalur në një çështje tjetër, ku është fokusuar puna e Policisë prej disa javësh, tek Paketa e Sigurisë në Shkolla, ministri foli për nevojën e krijimit të një koalicioni kombëtar kundër fenomenit të shpërndarjes së narkotikëve.
“Kemi patur mbi 400 të arrestuar që kur kemi filluar këtë operacion mbarë kombëtar, dhe dua të garantoj këdo se do të bëjmë gjithçka për të krijuar siguri brenda parametrit të sigurisë në shkolla, por jo vetëm, edhe në ambientet publike që frekuentohen nga të rinjtë. Të kemi sa më pak keqbërës që penetrojnë për të kompromentuar të ardhmen e shoqërisë sonë. Droga është një prej armiqve, ndoshta më i keqi për të ardhmen e shoqërisë, sepse prek të themelin e së ardhmen”, deklaroi Balla.
Ministri theksoi domosdoshmërinë e krijimit të një shembulli të mirë për fitimin e kësaj beteje.
