Ish presidenti Donald Trump është implikuar nga një prej punonjësve të tij në çështjen e dokumenteve të klasifikuara.
Yuscil Taveras, drejtues e menaxher i IT, i identifikuar si punonjës i Trump në 4 dokumente ligjore, ka ndryshuar dëshminë e tij, menjëherë sapo ndryshoi avokat mbrojtës, njoftuan prokurorët.
Tani ai akuzon ish-presidentin dhe dy ndihmës të tij për përpjekje për të fshirë pamjet e kameras së sigurisë, thonë prokurorët e çështjes.
Aktualisht ish-presidenti 77 vjeçar, përballet me 40 akuza për këtë çështje. Ndërkohë 2 punonjësit e tjerë të tij, të akuzuar nga drejtori i IT, ndihmësi personal Ualt Nauta dhe punonjësi i mirëmbajtjes në vilën në Mar-a-lago, Carlos De Oliveira, janë deklaruar të pafajshëm.
Donald Trump akuzohet se pas largimit nga Shtëpia e Bardhë, ka marrë prej saj dhe ka fshehur në vilën në Florida, dokumente sekrete, sensitive dhe është përpjekur ta fshehë këtë krim, duke fshirë pamjet e kamerave të sigurisë, për të mos patur asnjë provë.
Drejtuesi i IT së Trump, Yuscil Taveras, në dëshminë përpara gjykatës këtë mars vazhdimisht përsëriti se kurrë nuk i është kërkuar nga Trump apo njerëzit e tij që të fshijë pamjet e kamerave të sigurisë në Mar-a-Lago por tashmë e ndryshoi dëshminë e tij dhe akuzon drejtpërdrejt Donald Trump.
Thotë se prej këtij të fundit i është kërkuar të fshijë çdo pamje ku duken kutitë e mëdha të mbushura me dokumente, brenda resortit luksoz.
